طريقة البفتيك

البفتيك

من صفحة
 Loula shouma
اكلات زمان مع لولا شومان


باقطع بصل حلقات تخينه وادقها بايد الهون خفيف مع الملح تطلع ميتها
واتبل البصل بفلفل اسود وبهار لحم وملح وشوية خل فقط
لانى باعتمد على ريحة اللحمه المحمره في البفتيك وعلشان يفضل بلونه الوردي
باتبل شرايح البفتيك كويس واعملها طبقات فوق بعض علشان تشرب التتبيله
واقلبها مره او اتنين ونصف ساعه فقط

بانضف البفتيك تماما من البصل
وآخد البصل سوتيه في طاسه تيفال واسعه اعمله كرسبي
واحطه في قاع السيرفيس الي هاقدم فيه البفتيك بيدى ريحه حلوه جدا والكل بيحبه

واعمل التتبيله عباره عن
لكل كيلو بفتيك 3 بيضات وفنجان لبن وملح وفلفل اسود بسيط للقضاء على زفارة البيض


انزل البفتيك في البيض وعلى طول اطلع في البقسماط المبهر واضغط عليه كويس جدا وادخله التلاجه لا يقل عن ساعه
 

وابتدي احمر

في زيت علشان بيستحمل الحراره وما يتحرقش والزيت يصل لنصف شريحة اللحم فقط يعنى مش غزير
 

لو غزير هيفصل عن البقسماط ويتعوج
السمنه بتحرق البفتيك وتحتاج تغيريها كل شويه
 
باطلع البفتيك على ورق مطبخ وباعملها طبقات على ورق مطبخ علشان تمتص كل الزيت ويفضل سخن
 
واسيبه كده لقبل التقديم
واقدمه سخن فوق البصل الكرسبي وحواليه بطاطس بومفريت
وبالف صحه وعافيه

• صدور فراخ ومكرونة بطريقة جديدة
• كيكة الخلاط
• كب كيك بالنوتيلا
• فراخ مشوية بدبس الرمان وصوص الصويا
• عرق اللحمة الباردة